A Siangthou Baptisma a Sakramen
(The Sacrament of Holy Baptism)
Baptisma umdantah
A Khatna:
Baptisma kichi bang a hiei?
Baptisma kichi khu tuisihtam (Tui) guoh ahi pongsan sih a, Pasian thupiah in a tunkhum tui leh Pasian Kammal (Athu) toh kithuo khu ahi.
Pasian kammal kichipen tah bang a hiei?
I Mangpa Jesu Khrist in Mathiu bung top na ah tambangin agen hi: “Tuazieh in pei unlen, namchin apat nuazui ding bawl unlen, Pa leh Tapa leh Hagausiengthou min in baptis un,” Tami khu Pasian kammal ahi.(Mathiu 28:19).
Baptisma Thumal khu akhiehna bang ahiei?
Baptisma kichi thumal khiehna khu, “Tuisunga phumlutna, sopsiengna, tuibuahna, leh akibahpi dang dangte genna ahi. Mark 7:4 Tualeh van zuana muna kipat a ahing pei chiengun kisil masa louin ann ane ngai sih uhi. Tualeh thugousie dang tampi azui uh a uma; tuate khu noute, belte leh taubelte silsieng bang ahi.
Chiemtedi: Hagau Siengthou a Baptisma tansahna (Mat.3:11) ahia, tampen khu Hagau Siengthou ki sunbuohna chi ding ahi(Nasep.1:5 leh Nasep 2:17-18).
Baptisma tanna a kizang tui in khu bang chituom bihna anei e?
Pasian nasepna toh kisai ahizieha Tui Siengthou(Divine water) ichi loungal bangma aum sih hi.Khumi tui khu, tui dangte sanga manpha zaw leh thupi zaw ahi tuom sih a,hinanleh khumi tuilah ah khu’n Pasian kammal leh Athupieh um hi (Large Catechism IV 14)
Baptisma khu koi phukhiet ahiei?
Pa Pasian, Ama ngel ngel in tami Sacrament khu aphu doh ahi a, tuachi’n I Mangpa Jesu Khrist in Hattuomte kungah namchin kunga baptis bawl dingin Thupieh ahing bawl hi.
Mat.28:19-20 Tuaziehin pei unlen, namchin apat nuazui ding bawl unlen, Pa leh Tapa leh Hagau Siengthou min in baptis bawl un.
Pa leh Tapa leh Hagau Siengthou minjanga Baptisma kitan sah na in bang umjie anei e ?
Pasian-a-mithumte mina Baptisma itan chiengun, Ama, Pa leh Tapa leh Hagau Siengthou in kei khu, Ama ngel ngel toh pumkhat suoh ding leh kikhawlkhawm thei dinga ahing lahlutna ahi hi.
Baptisma khu koi in, koite kunga abawl ding ahiei?
A tangpi a Jesu Khrist hatna (called) tang, Pasian nasem te’n abawl thei ding ua, ahivangin, Pastor umlouna mun ah, akul le poimaw dan zil in (emergency) Baptisma tangsa Khristian khat in zong abawl thei ding hi. 1 Kor. 4:1 Tuachi’n mi’n koute pen Khrist nasemte leh Pasian thug uh kemte bangin hing ngaito uheh.
Chiemte ding: Baptisma toh kisai in tami simmun banah akigiela, ana sim in.
Baptisma tang ding Koite ahiei ?
“Chichi-Namchin” teng khu baptisma tansah ding ahi. Agen nuom pen khu, mizousie, ateh-akhang baptisma tangthei china ahi.
Baptisma piehdan akikhiehna bangchi umsah ding adiei?
A. Ki thuhilna pomthei, Ginna thu toh kisaia Khristian khat kibulphu dingdan zilsah leh pomthei te khu baptisma tansah pan giep ding ahi.
Nasep 2:38-39 Tuachi’n Peter in akung ua, “Kisia in lunghei unlen, na khelna uh ngaidam ahina dingin, Jesu Khrist min in baptisma tang chietun, tuachi’n Hagau Siengthou silpieh na tang ding uhi. Athuchiem khu nouma dingin zong na tate uh dingin zong, gamla tah a umte dingin zong, Mangpa Pasian in ahat poumate dingin zong ahi.” achi hi.
Nasep 2:41 Tuachi’n athu kipahtaha pom pouma in, baptisma atang chiet ua, tua niin mi tul thum vela belap in a um uhi.
Laisiengthou gendan: Ethiopian mipa khu ginna thu hil a aup zou a, baptisma pieh ahi pan bep hi (Nasep 8:26-39). Suongkul vengpa khu Khristian ginna thu hil ahizou in Baptisma tansah ahi pan bep hi (Nasep 16:25-33).
B. Naupang neu nou nou te jong, anu-le-pa ahei ahisihleh amau kemtu mohpuohna nei ten, baptisma tangsah dinga ahing pui uleh, tansah thei ahi.
Mak 10:13-15 Tuachi’n akhoi theina dingin naupangte akung ah ahing pui ua; hinanleh anuazuiten ahing puite ana phawh uhi. Hinanleh Jesu’n tua khu amu tahin alungkimta sih a, akung uah, “Naupang neute ka kungah hing peisah unlen kham sih un, aziehpen Pasian gam khu hichibang mite a ding ahi. Adihtahin ka hing hil ahi, mi koipou naupang neute banga Pasian gam kipahpi lou pouma asung ah alut sih ding uhi,” achi hi.
Naungeh te nasan zong bangzieha baptisma itansah koi ding uh ahiei?
Naungehte khu baptisma i tansah ding uh ahi, aziehpen:
A . “Chichin-Namchin” achina ah, tam naungehte zong ahuom pha hi.
Mat. 28:19 Tuazieh in pei unlen, namchin apat nuazui ding bawl unlen, Pa leh Tapa leh Hagau Siengthou min in baptis un.
Nasep 2:38-39. Tuachi’n Peter in akung ua, “Kisia in lunghei unlen, na khelna uh ngaidam ahina dingin, Jesu Khrist min in baptisma tang chietun, tuachi’n Hagau Siengthou silpieh na tang ding uhi. Athuchiem khu nouma dingin zong na tate uh dingin zong, gamla tah a umte dingin zong, Mangpa Pasian in ahat poumate dingin zong ahi.” achi hi.
B. Ngaikhawh tahin Jesu’n, naupangte Ama kunga pai dingin chielna abawl hi.
Luk 18:15-17 Tuachi’n akhoi dingin naungehte akungah ahing pui ua; hinanleh nuazuiten amu tah un aphawh uhi. Hinanleh Jesu’n ama uh akungah ahan a, “Naupang neute ka kungah hing peisah unlen khaam sih un, aziehpen Pasian gam khu hichibang mite a ding ahi hi. Chitah tahin ka hing hil ahi, koi hinaleh kPasian gam naupang neute banga kipahpi lou khu asungah alut vawtsih ding,” achi hi.
C. Khiel sa apieng ahiziehun, baptisma in ahing piehthei silte khu, naupangte’n zong apoimaw uhi.
Johan 3:5-6 Jesu’n adawnga, “Adihtahin ka hing hila hi, Mi koipou tui leh Hagau a, apientha sih leh Pasian gam alut thei sih ding hi. Tahsa a pieng pouma tahsa ahia, Hagau a pieng pouma Hagau ahi.
Eph. 2:3 Tua thumanglou tate lah ah eite zong tumasang laiin itahsa utna ah, itahsa leh ilungsim deilanm supichingin I um uhi; tualeh peindabn mawnga mi dangte bangin lungthahna tate ina hi uhi.
Mat. 18:6 Hinanleh tam Keima hing gingta neu noute lah a khat zong kipalpuasah pouma angawng uah bu hehna suongsum ki awsah henlen tuipi thutah ah kipailut leh ama a dingin ahoizaw ding hi.
Laisiangthou gendan: Baptistpa Johan khu apien apatsa Hagau Siengthou a dim ahi (Luke 1:15), tuabep hilouin, apien masang ajong Hagau Siengthou a dimsa ahita hi.(Luke 1:41-44)
Hattuomte’n bangchi dan a baptisma tangdingte huna leh panpina pete khu, akipahpi uh adiei?
Baptisma kichien taha tanga, Mangpa Ansieng ne le dawn te khu, huna leh panpina petute’n amu chiengun, theipitu kichientah ahing hizel uhi. Khum Baptisma tangte adingin, huna leh panpina petute’n, Thu anget sah zing uh ahi hi. Naupang neute ahi leh vang, Khristian hinkhua toh kituoha ahing pichin theina dingun, pan nasatah in alah pi zing uhi, ahideu diehin, Nu-le-pa neiloute bang khu. Tam banga panpina nasep sem ding khu, ginna leh biehna dan kibahpite ahi ding ahi.
Mt. 18:16 Hinanleh asannop sihleh, theipi mi ni ahiei, thum ahiei kama namdet ahi thei na dingin, mi khat ahiei ni ahiei zawpi in.
Eph. 4:16 Aman Ama a kipat in tahsa pumpi a unpi in kizopna thagui zousie in akizom sah a, aphankhawm ahi. Tuate ziehin tahsa hiengte chietin ama ama sep ding chiet asep chiengin, tua tahsa umpi akhang sah a, itna ah ama leh ama kibawl hoiin akhangtousah hi.
II. Baptisma a ihamphatna uh.
A Nina
Baptisma ibawl un bang phattuamna ang pie ei?
Tami baptisma in khielngaidamna nasep asem a, shina leh Setan apat ang hunkhie hi. Tuaban ah, a gingta te adingin tangtawn hundamna apie hi. Tampen Pasian kammal leh A Thuchiam in aphuang khie hi.
Pasian kammal leh A Thuchiam ichite khu bang bang adiei ?
I Mangpa Jesu Khrist in Mak bung tawpna ah hichiin achi hi: “Koipou a gingta a baptisma tang khu hundam in aum ding a; hinanleh agingtalou khu siemmaw tangin a um ding hi.” (Mak 16:16) Tamte khu Pasian kammal leh A Thuchiam ahi.
Bangchituha sil loupi leh manphatah Baptisma in ahing pieh atai ?
Baptisma in :
A . khielte ngaidamna nna asem hi.
Nasep 2:38 Tuachi’n Peter in akung ua, “Kisia in lunghei unlen, na khelna uh ngaidam ahina dingin, Jesu Khrist min in baptisma tang chietun, tuachi’n Hagau Siengthou silpieh na tang ding uhi. Athuchiem khu nouma dingin zong na tate uh dingin zong, gamla tah a umte dingin zong, Mangpa Pasian in ahat poumate dingin zong ahi.” achi hi.
Nasep 22:16 Tuin bang ngah nalai na hiei? Thou inlen baptisma tangin, Mangpa min in thungen inlen, na khelnate silsiengin, ahing chi hi.
B. shina leh Diabol apat ahing hunkhie hi.
Rom 6: 3,5 Eite Khrist Jesu a baptis a um poumate khu A shina ah baptis in I um uh chi theilou na hi uoi mah.
Gal 3:27 Aziehpen na lah uah Khris Jesu a baptisma tang pouma pen Khrist a kivon na hita uhi.
Kolosa 1:13-14 Aman miel silbawltheina a kipat in eite ahing hundoh a, A Tapa ittah gam ah ahing lutsah ta hi.
C. tangtawn hinna ahing pie hi.
Mak 16:16 Koipou agingta a baptisma tang khu hundam in aum ding a; hinanleh agingtalou khu siemmaw tangin aum ding hi.
1 Peter 3:21 Tua lim etsahnain baptisma in tuin, tahsa niehna silsiengna hilouin, Pasian lam a sie leh pha theina hoi suhlungkimna hi zawin, Jesu Khrist thawkianain ahing hundam hi.
Titus 3:5 Dihtatna nasep eiten ina bawlte zieh hilou in, Ama khotuona dungzui in eite ahing hundamta hi, tua hundamna pen Hagau Siengthou zieh a pienthana a silsiengna leh siemtha kiana zieh ahi.
I Mangpa Jesu Khrist in khelnate ngaidamna leh hundamna khu a loh khiehzou a, ahepina zieh liu-liau a eite ahing pieh nua nasan azong, bangzieha baptisma tanding ipoimaw nah lai lai uh ahiei?
Atah tah a gen in, Khrist in, Ama hinkhua bukimna toh, athuohna, ashina leh athawkinate zalin, leitung mihingte adinga khelnate ngaidamna leh hundamna khu buching tahin ahing zawpieh ta hi. Tami ngaidamna khu baptisma itanna uah hopin ium uhi.(Baptisma chi khu hepina zieha nasepsahna china jong ahi).
1 Kor 6:11 Na lah ua pawlkhat tambang mi na hi ngaita uhi. Hinanleh Mangpa Jesu Khrist min leh I Pasian uh Hagau a sawpsieng na hita ua, suhsiehgthou na hita uhi.
Titus 3:5-7 Dihtatna nasep eiten ina bawlte zieh hilou in, Ama khotuona dungzui in eite ahing hundamta hi, tua hundamna pen Hagau Siengthou zieh a pienthana a silsiengna leh siemtha kiana zieh ahi. Tua Hagau Siengthou khu I hundampa Jesu Khrist ziehin itung uah kiningching tahin ahing sungbuo hi. Ama hepina a siemtansah a um in kumtawn hinna kinepna dungzuiin gouluote hi dinga siem in ium ngei ding uhi.
Baptisma zieha tambang zouzai guolzawlna umte khu koite kunga pieh ding ahi diei?
Baptisma zieha tambang zouzai guolzawlna umte khu Pasian Hundamna Thuchiem gingtate kunga pieh ahi ding hi..
Mak 16:16 Koipou agingta a baptisma tang khu hundam in aum ding a; hinanleh agingtalou khu siemmaw tangin aum ding hi.
Baptisma tanglou mikhu hundam ahithei diei ma?
Gintatlouna bou khu ahi mawpai a iumna ding uh. Baptisma nual leh thusimlou mite lungtang ah ginna a umthei sih hi, aziehpen ama un baptisma sanga hoizaw theina neia aki koi jieh un. Hinanleh Jesu Khrist gingta a, baptisma tanna ding hunlemtang amu masang ua, shina ana tuohte khu mawsahin a um sih ding uhi.
Mak 16:16; …hinanleh agingtalou khu siemmaw tangin aum ding hi.
Laisiangthou gendan: Pharisaite leh Dansiem mite’n, gintatna aneilou ziehun Baptispa Johan baptisna khu apom sih uhi. (Luk 7:30). Sing Kross dawn a, guta kikhailia pa khu, baptisma tang man sih nanleh hundam in a um hi. (Luk 23:39-43).
I Thugin ua Baptisma umsapen banah, bangzieha eite’n, “Hagau Siengthou a ki baptisna Khu isuibe uh ngai lou e.” ?
I Thugin ua baptisma umpen chiloungal baptisma dang isuibe uh angai non sih hi, aziehpen:
A . Sacrament ni ipom te lah ua, “A Siengthou Baptisma” chiloungal Pasian in apieh baptisma dang a um mal mal sih hi.
Eph. 4:5 Mangpa khat, ginna khat, baptisma khat.
Chiemte ding: Baptisma toh kisai kithuhilna(Heb.6:2) a kigiel pen in, Khristiante adingin baptisma chituom tuom aum hi achina ahi laizang sih hi. Ahivanga, nidanglai a Sahkhua vaia kisuhsiengna chituom tuom te leh, tua igen Baptisma pen aki tuom khen vil vel ding ahi.(etsahna in Mak 7:4).
B . I Thugin ua Baptisma pen, Tui guoh toh bawl ahi sih a, Hagau guoh toh bawl jong ahi tuom sih a, Tui leh Hagau a baptis kibawl ahi zaw hi.
Johan 3:5 Jesun adawnga, “Adihtahin ka hiung hil a hi, Mi koipou tui leh Hagau a, apientha sih leh Pasian gam alut thei sih ding hi.
Tita 3:5 Dihtatna nasep eiten ina bawlte zieh hilou in, Ama khotuona dungzui in eite ahing hundamta hi, tua hundamna pen Hagau Siengthou zieh a pienthana a silsiengna leh siemtha kiana zieh ahi.
Chiemte ding: Mat. 3:11 na in “Tui toh ki baptisna” leh “Hagau leh Mei” toh ki baptisna agen a, hinanlejong I Thugin ua kigen Baptisma (Sacramental Baptism) leh Hagau Baptisma(Spirit Baptism) kibahlouna agenkha vot sih hi. Tami mun a agen dan pen, Mission Nasepna dinga kisahkhawlna leh Baptispa Johan baptis abawlna kikal banah buching taha Pasian nasem dinga guot a um Jesu Khrist ki baptisna te kikal agenna ahi hi. Baptispa Johan baptis bawl in khelnate ngaidamna pethei nanleh, akohnuam tah pen khu, hundampan tatkhietna nasep asepding kohna ahi zaw hi.
C . A tuom vilvel a Hagau Siengthou in chiemtena silpieh apieh khu “Baptisma tuom khat” ahi sih a, Apostolte thugen khu thutah kleh silbawltheina nei ahidan chetna leh namdetna ahi zaw hi.
Nasep 19:6 Tualeh Paul in atung ua akhut angah tahin, Hagau Siengthou atung uah ahing tungta a, ham theilou in aham ua, thu agenta uhi.
2 Kor.12:12 Atahtahin sawltah hina chiemtenate khu, chiemtenate, sillamdangte, silbawltheina nasepte, noute lah ah kukal tahin akibawl hi.
III. Baptisma a Silbawltheina
(The Power of Baptism)
A Thumna
Tuisihtam mai mai khat in bangchi talom a tambanga nna asep thei va-ie adiei?
A dihtah in tuiguoh in bangma asem thei sih hi. Hinanleh, khumi tui leh khumi tui sunga kijeplut Pasian Thuhing khu in nna ang sep ahi bou hi. Tuaban ah iginna toh kithua a khum Pasian Thuhing tui sunga kijeplut ahi chi imuanngam na khu in jong nahpi tahin nna sem hi.Pasian Thuhing panglou in khumi tui khu, tuisihtam, tui mai mai ahi lel hi. Hinanlejong, khumi tui-a Pasian Thuhing ang pan tah chiengin, hinna pie tuihing lui,hepina toh kidim leh Hagau Siangthou a pianthana leh sopsiengna Baptisma ang suah hi. Tita bung thum na ah misiengthou Paul in tam bangin a gen hi :
“Dihtatna nasep eite’n ina bawlte zieh hilou in, Ama khotuona dungzui in eite ahing hundamta hi, tua hundamna pen Hagau Siengthou zieh a pienthana a silsiengna leh siemtha kiana zieh ahi. Tua Hagau Siengthou khu I hundampa Jesu Khrist ziehin itung uah kiningching tahin ahing sungbuo hi. Ama hepina a siemtansah a um in kumtawn hinna kinepna dungzuiin gouluote hi dinga siem in ium ngei ding uh hi. Pasian gingtaten silhoi bawl ding ngaituo u’heh chi thu a muan huai ahi, tualeh tam thute khautah a na gen zing dingin ka dei hi. Tamte pen mihingte dingin ahoi a, tualeh a phatuam hi.” (Tita 3:5-8)
Baptisma tanna a tui kijang khu in bangchi dan a khelnate ngaidamtheina nasep asepthei a, shina apat leh Dawimangpa apat ahing hutkhiehthei bana tangtawn hundamna ahing pieh thei nalai adiei?
Sil um ngainailou khat tundingna, Pasian kammal mama in baptisma pansan in, tam silloupi tahtah te ahing pawkhie hi. Khumi tui in, ginna zala Pasian Thu imuan ngamna zuiin, khum guolzawlna zousie lakhie in, eite a ahing suohsah ta hi.
Eph. 5:26 Tuachia amaute tui a sil a, thu a suhsienga asawpsieng theina dingin.
Gal. 3:26-27 Aziehpen na unpi un Khrist Jesu ginna ziehin Pasian tate na hi uhi. Aziehpen na lah uah Khris Jesu a baptisma tang pouma pen Khrist a kivon na hita uhi.
Bangzieha Laisiangthou in baptisma khu “Pienthana-Sawpsiengna”(washing of rebirth) leh Hagau Siengthoua tha thah lahna(renewal of the Holy Spirit) ana chi adiei?
Baptisma itan tahchiengun, ginna in Hagau Siengthou in nna ahing sem a, tuachiin eite sungah , hagau a hinkhua thah a hing siem sah hi. Tuabanah, khelnate idouzaw nadingin, silbawltheina tha ahing guon hi.
Rom 6:6 Khelna tahsa mangthai sah a ium theina dingin leh khelna suoh a I um nawnlouna dingun I mihing lui uh Ama toh kilbeh in a um hi, chi ithei uhi.
Tita 3:5-8. Dihtatna nasep eiten ina bawlte zieh hilou in, Ama khotuona dungzui in eite ahing hundamta hi, tua hundamna pen Hagau Siengthou zieh a pienthana a silsiengna leh siemtha kiana zieh ahi.Tua Hagau Siengthou khu I hundampa Jesu Khrist ziehin itung uah kiningching tahin ahing sungbuo hi. Ama hepina a siemtansah a um in kumtawn hinna kinepna dungzuiin gouluote hi dinga siem in ium ngei ding uh hi. Pasian gingtaten silhoi bawl ding ngaituo u’heh chi thu amuonhuoi ahi, tualeh tam thute khautah a na gen zing dingin ka dei hi. Tamte pen mihingte dingin ahoi a, tualeh aphatuom hi.
IV. Baptisma in ahing kohmute
A Lina
Tambang talawm a Tui toh ki baptis na in bang koh anei ei ?
Tui toh ki baptis in a koh nop pen ahileh, ei a um Adam lui (Eden khelna) pen nichin a kisiana huaisie vot leh kisiamthana toh ishi sah ding uh ahi. Tuabanah khelna-mawna leh utna gilou jousie toh a shi khawm ding uh ahi. Tamte jou chiengin, ei mimal khu mihing tha (new man) isuah ta ding a, Khumi khu nichin a itha sua sah jing ding ahi. Khum eia patsa hing potdoh mihing tha khu Pasian mai ah dihtatna leh sianthouna (purity) toh ahing khangdoh dinga Pasian toh a tengkhawm tawntung ta ding hi.
Tam thu khu heia ki giel a hiei ?
Misiengthou Paul in Rom laibu bung guh na ah tambangin a giel hi: “Tuaziehin Pa thupina in mishi laha kipat in Khrist a kaithaw banga eite jong hinna tha a I hin theina dingun ashina ah baptis in ama toh vuiin I um uhi.” (Rom 6:4)
Adam lui (old Adam) kichi khu bang ahiei?
Adam lui kichi khu Adam in thuman louna jieha khelna a ana puhsiet gawpna, akhang akhang a hing guizui den pen ahi.Tami Adam lui khu mihing pienken lungtanga gitlouna ineite uh ahi.
Eite sunga um Adam lui khu bang ichi tummang sah ding adiai ?
I khelnate jieha lungtanga puohgihna(sorrow for sins) leh kisianate (repentance) ginna zala a nichin inei ua ahileh isunga um utna gilou tuom tuom te kidal zou thei a, tuabanga Adam lui khu tummang sah zing ding ahi.
Luk 9:23 Tuachi’n Aman amaute zousie kungah, “Mi koipou in jahing zui ut uleh amaleh ama kingaisah louin nichin in across klpuo in hing zui heh”achi hi.
Gal 5:24 Tualeh Khris a hi ta miten tahsa a a utnate u’leh adeigaw leh lunggulnate u’toh akilbehta uhi.
Mihing tha kichi khu bang ahiei?
Khelna apatsa sawpsienga iup ua, pienthana inei jieh ua siema um(created) Hagau hinna(spirtitual life) leh Hagau hinkhua(nature) khu Mihing tha akichi hi.
2Kor 5:17 Mi koijong Kris a a um leh, sil siemtha ahi ta hi.
Bang chibanga tam mihing tha khu hing poudoha hing khangkhie thei ding adiei?
Nichin a ginna thutah leh nasep hoi toh Pasian mai a hinkhua izah chieng un, khum mihing tha khu ahing poudoh in, ahing khang khedoh thei hi.
Eph. 4:24. Mihing tha, dihtatna leh sienthouna a Pasian kibahpi a siem pen sil un.
Nichin a Adam lui khu tummang deu deu ahidan leh mihing tha khu hing khang deu deu ahidan, Baptisma itan un bangchi’n ahing kilang doh sah ei?
Jesu Khrist shina leh thawkiana ah, eite jong, Baptisma tungtawnin apangkha ihi ta uhi. Aman ikhelna akivuikhum pi tah mabangin, eiten jong, inichin khelna khu ivuiliem pai pai ding uh ahi. Tuachia, Ama khu shina patsa kaithaw a ahing up a, hinna ahing neitah mabangin, eite’n jong Ama ah nichin hinkho thah a ihin ding uh ahi.
Rom 6:3-4 Eite Khrist Jesu a baptis a um poumate khu A shina ah baptis in I um uh chi theilou na hi uoi mah. Tuaziehin Pa thupina in mishi lah a kipat in Khrist a kaithaw banga eite zong hinna tha a I hin theina dingun, ashina ah baptis in ama toh vuiin I um uhi.
Bang thumal teng zieh a I Baptisma tanna uh, tatsat lou a,manghilloua, ithei zing zing uh ahiei ?
A Thumal teng khu, “Pa leh Tapa leh Hagau Siengthou min in, Amen.” chi ahi a, baptisma tanna kamteng a zah ding mong a Thupieh ihi uhi (Mat. 28:19).Tami Baptisma khu Pasian Ta ihina uh kibulpatna ahizieha panpina ngetna(help and support) leh thupha (blessing) ngetna ahi a, sap ham in Trinitarian Invocation akichi hi.
Eima ngel ngel in tam thumalte, ibieh inn a jong igen zing chiengun, Pasian ta ihina ikitheikhie a, igel doh kia ua, ihina dih tah igen na ahi. Tuaban ah van le lei,leh meidil leh silbangkim zousie masang ah, Pasian leh Asiengthou Pasian-a-mithumte’n, Baptisma ka tan ni apat ahing pieh hita chia iphuonzah na uh ahi hi.
873. Rom 8:38-39 Shina ahiei, hinna ahiei, vansawlsiengte ahiei, thuneinate ahiei, silbawltheinate ahiei, tuhun a sil umte ahiei, sil hing um dingte ahiei, Sanna ahiei, thuhna ahiei, ahisihleh silsiem dang mawng mawngin zong I Mangpa uh Khrist Jesu a um Pasian itna akipat ahing khen thei sih ding chi kichien tahin ka thei hi.
Laisiangthou gendan: I Mangpan baptisma ahing tan lai in, A hampha Pasian a mithumte, amau leh amau ahing ki sulang uhi.(Luk 3:21-22).Chiemte ding: Pasian-a-mithumte min gen a aup chiengin, Kross limlahna in azui di ahi. Tami khu, ilu leh ilungtang a ki baptisna in eite khu “Kross a khailup aum Khrist tatdohna” toh chiemte a um ka ihita china ahi hi.
A Siengthou Baptisma: Kin-le-buanga bawl dan, atomlam in.
A kul le poimaw dan zil in, Pastor umvotlouna mun ah, Khristian piching khat in jong Baptisma Siengthou a pethei hi. Tui noudim la in len, baptisma tangdingpa amin in han in len, alutunga tui na buoh kawm in tam thumalteng gen in, “Pa Pasian, Tapa Pasian leh Hagau Siengthou Pasian min in baptis ka hing bawl hi, Amen” chi in. Hun akibichil seng leh baptisma bawl zou phet in, Khristian Thugin gen unlen, tuazou chiengin Mangpa thumna toh zawp un.
Written by Rev Khup Do Khe
